نجيبه فلزات

تالقان (پژواک ٢١ ليندۍ ٩٣): د تخار د مرکز تالقانو ښار په ختيځه برخه خطايان سيمه کې شاوخوا درې زره تنه د سيند د غاړو له شګو سره زر راباسي او ګټه وټه ترې ترلاسه کوي.

دا کاريګر وايي چې په ژمي کې يې کاروبار له دې له امله  ښه کېږي، چې په سيند کې اوبه لږ وي.

د شاوخوا سيمې اوسېدونکوپه وينا، چې له کلونو راهيسې د سيمې خلک خپل لګښت له زر شويي څخه ترلاسه کوي.

د دغوکسانو په ډله کې يو هم ۵۰ کلن عبدالکريم دى، چې په وينايې له دېرشو کلونو راهيسې په همدغه سيمه کې د شګو په مينځلو بوخت دى.

کابل (پژواک، د وږي لومړۍ نېټه ٩٣): د کانونو برخې کارپوهان وايي چې د نورابه او سمتي د سرو زرو کان قرارداد په سليقوي ډول او د رفاقت پر بنسټ لاسليک شوى او قراردادي شرکت د دولت امتياز هم له ټاکل شوې اندازه سره سم نه دى ورکړى او د چاپېريال د خدماتو او ساتنې په برخه کې يې خپل مکلفيتونه نه دي ترسره کړي.

د نورابه او سمتي د سرو زرو کان د تخار ولايت په چاه اب ولسوالۍ کې موقعيت لري او د وزيرانو شورا د ١٣٧٨ کال د غويي مياشتې د ١٦مې مصوبې پر بنسټ يې قرارداد د کانونو او پټروليم وزارت او د "وست لند جنرل ټريدينګ" په نامه شرکت سره شوى دى.

کابل (پژواک ٥ زمری، ٩٣): د افغانستان د روڼتيا  د څار اداره  وايي، چې د قره ذغن سرو زرو کان څخه په ناقانونه ډول د يوه افغاني شرکت له خوا استخراج شوى دى.د دې ادارې مسوولينو د زمري په ٥مه، په يوه خبري غونډه کې په ډاګه کړه، چې د " افغان کرسټال" په نامه استخراجي شرکت د اکتشافي قرارداد له ترلاسه کولو وروسته، له هغه څخه په ګټې اخيستنې په ناقانونه ډول له دغه کان څخه  استخراج کړى دى.

کابل ( پژواک ۲۷ لېندۍ ۹۱) : دافغانستان دمرکزي بانک رييس او دکابل هوايي ډګر دګمرک يوه چارواکي هغه راپور په کله رد کړ، چې ګواکې له دغه هېواد څخه د سرو زرو د وېستلو په کچه کې زياتوالی راغلی دى .

 نيويارک ټايمز ورځپاڼې دکابل هوايي ډګر داوسنيو او پخوانيو چارواکو له قوله ليکلي ، چې د روان کال له اوړي راهيسې له افغانستان څخه د سرو زرو د وېستلو کچه لوړه شوې ده ، خو په دغه راپور کې د سرچينې نوم نه دی اخيستل شوی .

کابل (پژواک ٢٩ ورى ٩١): په پام کې ده ، چې ٢٥ نړيوالې کمپنۍ په افغانستان کې د سرو زرو او مسو د څلورو کانونو د اکتشاف او استخراج په برخه کې د پانګونې لپاره په خپل منځ کې سيالۍ وکړي.

د کانونو وزارت وياند محمد جواد عمر د وري په ٢٩مه، پژواک خبري اژانس ته وويل چې دا ٢٥ کمپنۍ د ٤١ نړيوالو کمپنيو له ډلې څخه دي، چې د غزني د زرکشان او د بدخشان د سرو زرو، د سرپل د بلخاب او هرات د شيدا د مسو په کانونو کې د پانګونې لپاره په شرايطو برابرې پېژندل شوې دي. 

کابل (پژواک ٢٠ مرغومى ٨٩): د بغلان د سرو زرو کان د راوېستنې په برخه کې د ٥٠ ميليونو ډالرو په ارزښت د پانګې اچونې تړون لاسليک شو.

دغه تړون د کانونو وزارت او افغان کرسټال نېچرل ريسورس کمپنۍ ترمنځ نن (د مرغومي په شلمه) لاسليک شو.

د کانونو وزير وحيدالله شهراني، د دې تړون د لاسليک کولو پر مهال وويل، چې د سرو زرو دغه کان د بغلان د دوشي ولسوالۍ د قره ذغن په سيمه کې موقعيت لري.

د نوموړي په وينا، د تړون له مخې په راروانو شپږو مياشتو کې به دغه کمپنۍ خپل پلانونه جوړ او تر هغه وروسته به د دې کان د پلټنو چارې پيل کړي.